महापौर अजीव पाटील यांच्याकडे गाऱ्हाणे; अधिकाऱ्यांना तत्काळ कार्यवाहीचे निर्देश
वसई-विरार (विशेष प्रतिनिधी):
नाळा गावातील प्रलंबित नागरी प्रश्न, अपूर्ण विकासकामे आणि स्थानिक नागरिकांना भेडसावणाऱ्या विविध समस्यांसंदर्भात प्रभाग क्रमांक १३ च्या नगरसेविका ॲड. दिप्ती चेतन भोईर यांनी पक्षाच्या ज्येष्ठ कार्यकर्त्यांसह महापौर अजीव पाटील यांची भेट घेतली. या बैठकीत महापौरांनी नाळा गावातील समस्यांची गंभीर दखल घेत संबंधित महापालिका अधिकाऱ्यांना तत्काळ आवश्यक कार्यवाही करण्याचे निर्देश दिले आहेत.
लोकनेते हितेंद्र ठाकूर व आमदार क्षितिज ठाकूर यांच्या मार्गदर्शनाखाली, तसेच उपमहापौर मार्शल लोपीस व स्थायी समिती सभापती प्रवीण शेट्टी यांच्या सहकार्याने प्रभाग १३ मधील स्थानिक नगरसेविका ॲड. दिप्ती चेतन भोईर, सॅरल डाबरे आणि परेश किणी यांचा नाळा गावातील नागरी सुविधांसाठी सातत्यपूर्ण पाठपुरावा सुरू होता.
अधिकाऱ्यांना सभागृहात पाचारण
शुक्रवारी बहुजन विकास आघाडीच्या शिष्टमंडळाने महापौरांची भेट घेऊन परिसरातील पायाभूत सुविधा आणि विकासकामांबाबत सविस्तर चर्चा केली. विषयाचे गांभीर्य लक्षात घेऊन महापौर अजीव पाटील यांनी तत्काळ संबंधित विभागाच्या पालिका अधिकाऱ्यांना सभागृहात बोलावून घेतले. कार्यकर्त्यांसमवेत प्रत्यक्ष चर्चा घडवून आणत प्रलंबित कामांचा आढावा घेण्यात आला व धोरणात्मक निर्णय घेण्याचे आदेश देण्यात आले.
बविआच्या शिष्टमंडळाचा सहभाग
या महत्त्वपूर्ण बैठकीस बहुजन विकास आघाडीचे ज्येष्ठ कार्यकर्ते उपस्थित होते. यामध्ये प्रामुख्याने:
- प्रकाश राऊत, मायकल कोरीया, संजय म्हात्रे, कुमार तांडेल
- मोहिनी भोईर, नितेश चौधरी, राकेश म्हात्रे, सुधीर कांबळे
- आदित्य म्हात्रे, कैलास पाटील आणि ॲड. चेतन भोईर
नागरिकांच्या प्रश्नांसाठी कटिबद्ध
नागरिकांच्या अडचणींची तात्काळ दखल घेऊन सकारात्मक भूमिका घेतल्याबद्दल उपस्थितांनी महापौरांचे आभार मानले. नाळा गाव व प्रभाग क्रमांक १३ मधील नागरिकांच्या सर्व समस्या सनदशीर मार्गाने व प्रभावीपणे सोडवण्यासाठी बहुजन विकास आघाडी सदैव कटिबद्ध राहील, असा विश्वास नगरसेविका ॲड. दिप्ती भोईर यांनी यावेळी व्यक्त केला.