मुंबई, दि. २ जुलै २०२५:
वसई विधानसभेच्या आमदार सौ. स्नेहा दुबे-पंडित यांनी राज्याच्या उपमुख्यमंत्री व वित्तमंत्री मा. देवेंद्र फडणवीस यांची विधान भवन, मुंबई येथे भेट घेऊन वसई तालुक्याच्या विकासाशी निगडित तीन अत्यंत महत्त्वाच्या मागण्यांचे निवेदन सादर केले. या भेटीला वसई तालुक्याच्या दृष्टीने सकारात्मक व निर्णायक स्वरूप लाभले.
महत्त्वाच्या मागण्या:
🔹 खंडित वीजपुरवठा – उद्योगधंद्यांवर परिणाम:
वसईतील वारंवार खंडित होणाऱ्या वीज पुरवठ्यामुळे स्थानिक उद्योजक आणि व्यापाऱ्यांमध्ये प्रचंड असंतोष आहे. महावितरणच्या अकार्यक्षमतेमुळे संपूर्ण औद्योगिक विकास ठप्प होत चालल्याचे दुबे-पंडित यांनी निदर्शनास आणले. उपमुख्यमंत्र्यांनी यावर त्वरित उपाययोजना करण्याचे आश्वासन दिले.
🔹 अर्नाळा बेटासाठी पूल उभारणीची मागणी:
पर्यटनदृष्ट्या तसेच स्थानिक रहिवाशांच्या दळणवळणासाठी अर्नाळा ते अर्नाळा किल्ला या दरम्यान जलमार्गावर पूल उभारण्याची मागणी MMRDA मार्फत करण्यात आली. हा पूल उभारल्यास संपूर्ण परिसराचा कायापालट होईल, असा विश्वास आमदारांनी व्यक्त केला.
🔹 वसई-विरारमधील पायाभूत सुविधांना गती:
मुंबई महानगर प्रदेश विकास प्राधिकरणाकडे प्रस्तावित असलेल्या विविध पायाभूत सुविधा प्रकल्पांना गती देण्यासाठी व मंजुरीसाठी विशेष लक्ष देण्याची मागणी करण्यात आली. यामध्ये रस्ते, ड्रेनेज व पाणीपुरवठा यांसारख्या मुलभूत गरजांचा समावेश आहे.
उपमुख्यमंत्र्यांकडून सकारात्मक प्रतिसाद:
मा. देवेंद्र फडणवीस यांनी सर्व मागण्या ऐकून घेतल्या आणि संबंधित विभागांना तातडीने कार्यवाही करण्याचे आदेश दिले.
“वसईच्या सर्वांगीण विकासासाठी माझे प्रयत्न सुरूच राहणार आहेत. नागरिकांचे प्रश्न आणि त्यांच्या गरजा हीच माझी सर्वोच्च प्राधान्ये आहेत,” असे आमदार सौ. स्नेहा दुबे-पंडित यांनी स्पष्ट केले.