विरार (पूर्व) : विद्यार्थ्यांमध्ये बालसुरक्षा, सुरक्षित-असुरक्षित स्पर्श आणि लैंगिक अत्याचारापासून स्वसंरक्षणाबाबत जनजागृती निर्माण करण्यासाठी विरार (पूर्व) येथील श्रीमती ताराबाई वर्तक अकादमीमध्ये (CBSE) नुकतीच एक विशेष मार्गदर्शन व्याख्यानमाला पार पडली. शिव विधी व न्याय सेना (आगाशी-विरार), अर्नाळा शिक्षण संस्था आणि संविधान प्रतिष्ठान यांच्या संयुक्त विद्यमाने या उपक्रमाचे आयोजन करण्यात आले होते.बालवाडी ते इयत्ता पाचवीपर्यंतचे विद्यार्थी आणि त्यांच्या पालकांसाठी आयोजित या कार्यक्रमात बालकांच्या सुरक्षिततेचा मुद्दा अत्यंत संवेदनशीलपणे मांडण्यात आला.कार्यक्रमास मुंबई उच्च न्यायालयाच्या अधिवक्त्या तथा शिव विधी व न्याय सेनेच्या महाराष्ट्र उपाध्यक्षा ॲड. स्वप्ना प्रमोद कोदे आणि संविधान प्रतिष्ठानचे सचिव ॲड. गिरीश अरविंद दिवाणजी प्रमुख वक्ते म्हणून लाभले. त्यांच्यासह ॲड. प्रसाद मनोहर ओटवकर आणि ॲड. दीपिका सतीश पाटील यांचीही विशेष उपस्थिती होती.

• स्पर्शाची ओळख: ॲड. स्वप्ना कोदे यांनी विद्यार्थ्यांना त्यांच्या वयाला साजेसे अशा सोप्या भाषेत ‘गुड टच’ व ‘बॅड टच’ची संकल्पना समजावून सांगितली. असुरक्षित स्पर्श झाल्यास ठामपणे ‘नाही’ म्हणणे, घटनास्थळावरून दूर जाणे आणि विश्वासू व्यक्तीकडे मदत मागणे, याचे धडे त्यांनी दिले.
• पोक्सो कायदा व हक्क: ॲड. गिरीश अरविंद दिवाणजी यांनी संविधानाने बालकांना दिलेले हक्क आणि POCSO कायद्याची माहिती दिली. बालकांचे रक्षण करण्यासाठी पालक, शिक्षक व संपूर्ण समाजाची सामूहिक जबाबदारी किती महत्त्वाची आहे, यावर त्यांनी प्रकाश टाकला.
• व्याख्यानमालेदरम्यान विद्यार्थ्यांच्या मनावर “माझ्या शरीरावर माझा अधिकार” हा विचार बिंबवण्यात आला. कोणत्याही संशयास्पद प्रसंगी काय करावे, यासाठी विद्यार्थ्यांना खालील मूलमंत्र देण्यात आला:
• NO (नको): नको असलेल्या किंवा असुरक्षित स्पर्शाला ठामपणे नकार देणे.
• GO (जा): त्या धोकादायक परिस्थितीमधून तात्काळ सुरक्षित ठिकाणी दूर जाणे.
• TELL (सांग): घडलेल्या प्रकाराबद्दल आई-वडील किंवा विश्वासू व्यक्तीला त्वरित माहिती देणे.
• श्रीमती ताराबाई वर्तक अकादमीचे शिक्षक, शिक्षकेतर कर्मचारी आणि शाळा व्यवस्थापन समितीच्या सदस्यांनी या मोहिमेत सक्रिय सहभाग घेतला. या व्याख्यानमालेत ५०० हून अधिक विद्यार्थी व पालकांनी ऑफलाईन आणि ऑनलाईन माध्यमातून उत्स्फूर्त सहभाग नोंदवला. बालकांना स्वतःच्या शरीराबद्दल जागरूक करणे आणि प्रसंगी आवाज उठवण्याचा आत्मविश्वास निर्माण करणे गरजेचे असल्याचा संदेश या उपक्रमाने दिला.